DILI,MJ-Tersa-Feira 29 Abril 2025 Sua-Eselénsia Ministru Justisa, Dr. Sérgio de Jesus Fernandes Hornai partisipa iha serimónia toma pose ba Dr. Afonso Carmona sai nu’udár Prezidente Tribubál Rekursu, iha Palásiu Prezidensiál, Nicolau Lobato, Díli.
Nomeasaun Juiz Afonso Carmona ne’e, formaliza liuhosi Dekretu Prezidente Repúblika Numeru 35/2025, ne’ebé asina hosi Prezidente José Ramos-Horta. Nomeasaun ne’e mai hosi kbi’it konstitusionál ne’ebé atribui ba Tribunál Rekursu ne’ebé, nu’udar instánsia másimu hosi organizasaun judisiál iha Timor-Leste, ezerse provizoriamente funsaun Supremu Tribunál Justisa nian to’o instalasaun hosi órgaun ne’e.

Dekretu prezidensiál ne’e haktuir espresamente katak nomeasaun ne’e halo “tuir termu alínea j) hosi artigu 86, kombina ho numeru 3, hosi artigu 124, no numeru 2 hosi artigu 164 hosi Konstituisaun Repúblika Demokrátika Timor-Leste nian”.
Iha serimónia ne’e, prezide hosi Prezidente Republika, Dr. J. Ramos Horta, ne’ebé partisipa hosi Prezidente Parlamentu Nasionál (PPN), deputada Maria Fernanda Lay; Sua-Eselénsia Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay.

Nune’e mós Sua-Eselénsia, Vise-Primeiru-Ministru, Ministru Koordenadór ba Asuntu Sosiál no Ministru ba Dezenvolvimentu Rurál no Habitasaun Komunitária, Mariano Assanami Sabino; Ministru Prezidénsia Konsellu Ministru, Agio Pereira; Ministru Administrasaun Estatál, Tomás do Rosário Cabral; Ministru Defeza, Donaciano do Rosário Gomes; no Vise-Ministru Fortalesimentu Institusionál, Paulo Manuel da S. dos Remédios no mós Prezidente Tribunal Recursu Sesante no Korpu Diplomátiku sira no entidades relevante sira seluk.