RAEOA,MJ-Sesta-Feira 09 Maiu 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai hamutuk ho Sua-Eselénsia Prezidente Autoridade Rejiaun Administrativa Espesiál Oe-Cussê Ambeno (RAEOA), Rogério Tiago de Fátima Lobato realiza sensibilizasaun kona-bá lei importante neen, iha Otél Oe-Upu, Palabán, iha Rejiaun Administrativa Espesiál Oé-Cussê Ambeno (RAEOA).
Iha sensilizasaun lei sira kona-bá na’in ba rai, iha Rejiaun Administrativa Espesiál Oe-Kusi Ambeno maihosi sub-rejiaun Pásabe, Oé-Silo, Pante-Makasar no Nitibe kompostu hosi suku 20 iha RAEOA.

Objetivu hosi sensibilizasaun ne’e, atu sensibiliza kona-bá lei asuntu rai no uma, ne’ebé programa husi Ministériu Justisa nian, ne'ebé servisu hamutuk ho Sua-Eselénsia Prezidente Autoridade Rejiaun Administrativa Espesiál Oe-Cussê Ambeno (RAEOA), nune’e bele hakbi’it koñesimentu ba komunidade sira.
Ministru Justisa fundamenta, disseminasaun ne’e atu lori besik informasaun ba komunidade hodi nune’e komunidade bele hetan esklaresimentu hosi Minsitériu Justisa.
Ministériu Justisa sensibiliza mak hanesan; Lei nú 13/2017, 5 Juñu nian kona-ba Rejime Espesiál ba Definisaun Titularidade Bein Imovel, Dekretu-Lei númeru 65/2022 kona-ba Informasaun Kadastrál Prediál, Lei nú 8/2017 kona-ba Espropriasaun Tanba Utilidade Públika.

Nune’e mós Dekretu-Lei nú. 5/2020 kona-ba Organizasaun no Funsionamentu Komisaun Rai no Propriedade nian, dekretu lei nú. 15/2014 kona-ba Orgánika Polísia Sientífika no Investigasaun Kriminál no Lei nú. 9/2002 kona-ba Nasionalidade.
“IX Governu Konstitusionál halo esforsu maka’as hodi atribui sertifikadu direitu propriedade ba sidadaun sira. Ita tenke optimista tanba sertifikadu propriedade sidadaun sira bele ba husu osan hodi halo atividade negósiu hodi dezenvolve sira-nia indústria ki’ik bele hasa’e sira-nia kresimentu moris ninian,” Sua-Eselénsia Ministru Justisa, Dr. Sérgio de Jesus Fernandes da Costa Hornai hateten.
Ministru Justisa hato’o agradesimentu ba komunidade sira, autoridade lokál sira, líder komunitáriu sira, veteranu sira, estudante sira no lia-na’in sira-nia pasiénsia bele rona lei importante hirak-ne’e.
Iha sensibilizasaun ne’e, partisipa hosi Sekretáriu Terra no Propriedade Rejistu no Notariadu, Dr. Marcelino Marques Coro, Sekretária Rejionál ba Asuntu Agrikultura, Filomena Sila, Sekretáriu Rejionál Adminisgtrasaun, Andre Lao, Sekretáriu Rejionál ba Asuntu Saúde, Dr. Luis de Jesus Neno.
Ministru Justisa apresia ba dirijente sira hosi Ministériu Justisa tanba ho vontade boot bele transmite materia hirak-ne'e ba komunidade sira iha RAEOA.