DILI,MJ-Segunda-Feira 12 Maiu 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai hasoru malu ho Prezidente Repúblika, J. Ramos-Horta, atu diskute no atualiza kona-ba direitu ba rai no reforma judisiária, iha Palásiu Prezidensiál, Nicolau Lobato, Bairru-Pite, Díli.
Sua-Eselénsia Ministru Justisa atualiza informasaun komprensivu kona-ba progresu Ministériu Justisa nian ho sistema kadastrál nasionál, destaka levantamentu rai ne’ebé kompleta ona iha rejiaun orientál sira no illa Ataúro, ho planu atu finaliza títulu ba rai tuir Lei 13/2017 iha 2028.

Iha enkontru ne’e, ko’alia mós kona-ba inisiativa kooperasaun internasionál Timor-Leste nian, inklui kolaborasaun ho governu Abu Dhabi nian kona-ba projetu dezenvolvimentu rai estadu nian hanesan dormitóriu ba estudante sira.
Sua-Eselénsia Ministru Justisa Dr. Sérgio Hornai informa importánsia hosi koordenasaun interministeriál, partikularmente entre Ministériu Justisa no Ministériu Obras Públikas no Ministru Administrasaun Estatal atu rezolve kestaun sira relasiona kona-ba rai ho efetivu.
Prezidente Repúblika rekoñese kompromisu Ministériu Justisa nian ba reforma judisiária no subliña importánsia atu hatán lalais ba pedidu sira hosi nasaun parseiru sira enkuantu garante ezekusaun loloos ba prosesu hetan nasionalidade Timor-Leste nian ba ema estranjeiru sira, bele liuhosi dalan kazamentu ka naturalizasaun nian hanesan hatuur iha Lei 9/2002.

Ministru Justisa Dr. Sérgio Hornai akompaña hosi Diretór Jerál Terra no Propriedade, Lucas António da Costa, Diretór DNTP, Gaspar Benevides, Xefe Unidade Arrendamentu Bens Imoveis do Estadu, Helder Cosme Marçal Belo.

center>#Media Gabinete Ministru Justisa#