AILEU,MF-Sesta-Feira 15 Augustu 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai, akompaña husi Rep. PAM liuhosi Sekretária ba Asuntu PIDI "Sra. Victória Mesquita do Rêgo", reafirma konfiansa ba formandu hamutuk na’in-25 ne’ebé partisipa ona formasaun durante loron lima (5) hodi fó kontribuisaun ba servisu públiku iha Ministériu Justisa iha teritoriu Timor-Leste.
Ohin konklui ona formasaun ida-ne’e, fo materia sira ba formandu hosi ajente funsionáriu públiku hodi kontinua servi ba rai doben no povu Timor-Leste.
“Ha’u dezeja ita boot sira, hodi bele kontinua aplika no praktika materia sira no koñesimentu ne’ebé ita simu, atu servisu efetivamente ba povu no rai doben Timor-Leste” Ministru Justisa hato’o diskursu iha serimónia ensera formasaun nain-25 ne’ebé realiza iha Munisipiu Aileu.

Tanba Munisipiu Aileu ne’e, sai pontu importante depois Dili nakfera. Asuwain sira halai sae mai iha Munisípiu Aileu hodi konsolida forsa, rejista no valorizadu iha luta nasional ba ukun rasik aan. Ho sira–nia sakrifísiu boot, fó sira nia vida atu defende direitu no lia loos ba sira nia povu no rai doben Timor-Leste.
Ho objetivu hosi Diretór Nasional ba Rekursu Umanu iha Ministériu Justisa realiza formasaun ne’e, primeiru oinsa maka atu bele eleva ita boot sira nia koñesimentu jeral liu-liu nu’udar ajente funsionariu públiku iha funsaun públiku estadu ninian. Iha liña Ministérial sira to’o mai iha instituisaun autonomia direita ka indireita estadu ninian.

“Ita buka atu kontinua dezenvolve funsionáriu ida-idak ho kapasidade an. Ita boot sira tenke iha kompeténsia no kbi’it atu kompriende jestaun, hanesan mós desízaun balun ne’ebé presiza foti. Tanba kada desízaun mak parte hosi responsabilidade, ne’ebé atribuí hosi kompeténsia no funsaun ofisiál ne’ebé ita boot sira simu husi superior”
Ministru Justisa mós fó agradesimentu ba formador sira mai hosi Komisaun Funsaun Públika, Ministeriu justisa rasik, formador balun mai hosi Munisipiu depende ba sirkunstansia material ne’ebé define ona iha Planu Asaun Annual ne’ebé introduz ba iha formasaun tinan ida-ne’e nian.

Formandu sira mai hosi Diresaun Jeral Politika Justisa, Diresaun Nasional Asesor Juridiku no Lejizlasaun, Diresaun Nasional Direitu Humanu no Sidadania, serbisu prizional ninian. Nune’e mós Diresaun Jeral Administrasaun no Diresaun Jeral Terras no Propriedade, Diresaun Jeral Servisu Rejistu no Notariadu, Sentru Formasaun Juridika no Judisiaria no departamentu sira seluk iha Ministériu Justisa.
Iha serimónia enseramentu ne’e, partisipa hosi reprezentante Prezidente Autoridade Munisipiu Aileu, Prezidente Komisaun Terras no Propriedade, Pascoal da Costa Soares, Sekretáriu Ezekutivu Komisaun Terras no Propriedade, Celito Cardoso, Diretór Jerál Servisu Rejistu no Notariadu, Dr. Agustinho Gonçalves Vieira, Diretór Nasional Rekursu Umanu Ministériu Justisa, formadór sira no ekipa tekniku sira.